DPL ta recorda comunidad henter cu tur su servicionan ta completamente gratis!

Departamento di Progreso Laboral (DPL) pa medio di esaki kier a informa y recorda nos comunidad completo cu tur su servicionan na buscador y dunadornan di trabao ta completamente gratis. DPL ta un departamento cu a habri na aña 2011 cu como meta principal pa asina trece e buscador y dunadornan di trabao mas serca di otro riba nos Mercado laboral. DPL ta fungi como un puente entre ambos partido y ta haci esaki abase di intermediacion laboral caminda cu DPL ta trata di aloca e persona ideal na e funcion ideal. E departamento aki ta brinda su servicio di intermediacion laboral (yudabo busca y haya un trabao) unicamente na esnan local cu No tin mester di un permiso pa por traha na Aruba.

Dunadornan di trabao cu ta buscando un of mas empleado tambe por aserca DPL pa asina pone nan vacatura(nan) disponibel of pa sondea den e database si acaso DPL por tin buscadornan di trabao apto y dispuesto pa tuma e trabao prome cu por ehempel bay over na busca un persona di exterior pa bin haci esaki. E servicio aki di pone vacatura(nan) disponibel tambe ta totalmente gratis y ta wordo trata abase di un cita cu DPL caminda cu abo como dunador di trabao no mester perde mucho tempo pa sinta warda sino bo ta simplemente acudi na DPL riba e fecha di bo cita y wordo atendi cu hopi placer pa asina yudabo yena y presenta e documentonan necesario.

A bin tuma nota cu hopi clientenan ta opta pa haci uzo di “tramitador” of tambe asina yama Consultancy cual ta nan escohencia y derecho pero alaves a bin tuma nota cu mas y mas ta creando e impresion incorecto den comunidad cu DPL lo ta cobra sierto suma di placa pa por ehempel pone/entrega un vacatura y/of entrega cualkier peticion na e departamento di Admision Stranhero (Toelating) cual nos ta descarta enfaticamente. DPL ta ehecuta na tur momento e maneho stipula pa Ministerio di Labor (cual ta un documento disponibel na balie di DPL) caminda cu no tin niun sorto di suma of pago ta wordo exigi como parti e procesonan y/of documentonan cu DPL ta produci. DPL no tin un cashier loket y mucho menos ta cobra e cliente pa su servicionan, pa e motibo aki DPL ta encurasha tur dunador di trabao pa acudi libremente na DPL y haci e proceso nan mes pa asina evita cu mester paga sumanan exorbitante innecesariamente. Pa cualkier informacion adicional riba DPL su servicionan por pasa libremente na DPL situa na Seroe Blanco # 4 of por yama na 5215555.