Haya sa mas di e proceso di busca y haya trabao riba nos Mercado laboral

vacancies DPL

Haya sa mas di e proceso di busca y haya un trabao riba nos Mercado laboral

Desde aña 2011 Departamento di Progreso Laboral a bin ta ofrece su servicionan dirigi specificamente riba esnan local cu no tin un trabao of esnan local cu ta buscando un mihor of otro trabao. E meta principal di DPL ta pa fungi como un puente entre e buscador di trabao y e dunadornan di trabao. Esaki ta wordo haci abase di intermediación laboral pa asina yuda e buscador di trabao sondea e mihor oportunidadnan laboral pa su desaroyo. Durante e labornan aki ta constata cierto aspectonan cu ta sumamente importante pa asina logra subi nos mercado laboral.

Educacion y curso
Pa por subi nos mercado laboral ta esencial pa tin un bon base di educación y trainingnan relevante (curso) y tambe pa mantene nos mes riba e mercado laboral.
Pa e motibo aki ta encurasha tur persona cu ta buscando un trabao pa asina percura pa sigui cursonan cu lo por engrandece nan oportunidadnan laboral riba nos mercado. Ta sumamente importante pa actualisa bo curiculum (CV) tur aña cu minimo un curso adicional of specifico mirando cu technologia y areanan laboral ta hopi dinamico y ta cambia constantemente. Por ehempel un persona cu a studia pa trabaonan administrativo 15 aña pasa no lo haya un trabao fácilmente awendia sin tin e curso y conocemento di Quickbooks. Sin kita afor cu mayoría trabao, te asta trabaonan básico ta exigi pa por domina e mundo digital awendia (computer, tablets etc). Ta sumamente importante pa mantene bo mes y bo CV “up to date” cu e ultimo trendsnan riba bo ramo (función) laboral.

Digitalisacion
Awendia mayoría companianan ta dispone di un sistema di solicitud digital caminda cu ta exigi pa por aplica online y/of pasa un test digital prome cu bo bin na remarke pa un entrevista laboral. Pa e motibo aki ta encurasha tur buscador di trabao pa mantene nan mes “up to date” cu e mundo digital y technologico. Den futuro por spera cu mas y mas companianan lo bay haci uzo di e sistemanan aki caminda cu mester manda un CV online prome y después ta haya un entrevista.
Ta recomenda tur buscador di trabao pa dispone di nan informacionnan di solicitud digital (CV, carta di solicitud etc).

Dominio di idioma
E dominio di idiomanan ta sumamente importante pa asina por haya y mantene un trabao. Mirando cu un di e sectornan laboral di mas grandi na Aruba ta Horeca, ta sumamente importante pa por domina e idioma Ingles pa asina engrandece bo oportunidadnan laboral. Ta recomendabel pa domina minimo e Papiamento, Ingles, Spaño y tambe e Hulandes mirando cu mayoría trabao awendia ta dirigi ariba nos turismo caminda cu ta exigi pa domina e idiomanan menciona, principalmente e Ingles y Spaño. Idioma ta keda un aspecto importante pa nos tur y Aruba ta dispone di diferente instancianan cu por yudabo desaroya e dominio di idiomanan facilmente. Ta importante pa bo CV specifica cua idioma y con bo ta domina e idioma(nan), p.e. Ingles: verbal, por escrito y/of lesa/compronde.

Comunicacion
Un otro aspecto importante ta e abilidadnan social (sociale vaardigheden) y un actitud/comportacion positivo. Na momento cu bo ta carece di e abilidadnan social esaki por strobabo di haya un trabao mirando cu awendia bo mester por convence un dunador di trabao pa medio di un of mas di e asina yama “Entrevista laboral” cu abo ta e mihor candidato. Esaki tambe ta un punto importante pa tene cuenta cune den e futuro. E aspecto di traha un carta of CV y entrega pa haya un trabao ta importante pa haya un Entrevista laboral pero awendia tur cos ta depende tambe di un Bon entrevista laboral, un imagen propio profesional (bon referencia), branding y e actitud positivo di abo como solicitante. Cu otro palabra, bo mester por bende bo mes durante e Entrevista laboral como e mihor candidato cu lo yuda e companía crece den futuro.

Tipsnan Entrevista Laboral
Durante un Entrevista laboral mester mantene e combersacion positivo y dirigi unicamamente riba e solicitud y abo como un bon candidato, mester mantene contacto di wowo (wak e persona den su cara), elabora riba bo puntonan fuerte y positivo, papia e berdad y presenta bo mes como un persona serio y responsabel, acudi cu un vestuario adecuado (respetoso y profesional), acudi na tempo (15 minuut porme), saluda cu un handshake, presenta cu tur documentonan pidi y
percura pa bo informa bo mes prome cu e Entrevista laboral tocante e compania unda bo ta bay solicita (por uza; google, social media manera Facebook etc).

Ban Traha Ban Progresa!