Ora bishita DPL pa busca trabou mester presenta cu “vestuario adecuado” pa asina engrandece oportunidadnan laboral

Mirando cu tin posibilidad pa haya un entrevista laboral inmediatamente!

Departamento di Progreso Laboral kier a informa na tur esnan cu ta bishite pa asina busca un trabou pa medio di Arbeidsbemiddeling en Re-integratie (Jobcenter) cu den cuadro di duna calidad di servicio y un experencia satisfactorio na dunadornan di trabou y buscador di trabou, DPL ta sigui haci su maximo esfuerzo pa asina selecta y ofrece e mihor candidatonan local pa e funcion (nan) cu dunadornan di trabou ta pone disponibel. Ta asina cu despues di bishita DPL pa registra y sondea e posibilidadnan cu un Arbeidsbemiddelaar (consulent) cu exito bo por bin na remarke pa wordo manda cu un carta (drievoud) na bo prome entrevista laboral of sera conoci cu e dunador di trabou. DPL ta intermedia unicamente pa personanan local (esnan cu No tin mester di un permiso pa traha na Aruba), pues pa e motibo aki mester presenta cu un identificacion valido na DPL ora di busca trabao.

Hopi biaha DPL ta constata e diferente obstaculo/contratiemponan cu su clientenan ta encontra ora di busca trabou of tin biaha pa falta di informacion riba por ehempel;
“Entrevista laboral, vestuario adecuado of abilidadnan social pa presenta y convence dunadornan di trabou”. Tambe ta tuma nota cu hopi cliente ta presenta sin documentonan necesario (diploma, certificado, carta di recomendacion etc) y esaki hopi biaha ta forma un obstaculo pa por subi e Mercado laboral cu na e momentonan aki ta exigi hopi.

Mirando cu e prome impresion ta conta hopi y ta bay determina tambe si e dunador di trabou lo haya interes den e buscador di trabou, ta hopi importante pa e buscadornan di trabao laga un bon impresion atras durante nan prome bishita/entrevista. Aki ta referi na con e buscador di trabou ta presenta su mes na e entrevista, con e ta bisti, su actitud y abilidadnan social. Tambe DPL kier a pone enfasis cu ta hopi importante pa ora bishita DPL sali for di cas manera ta “entrevista laboral” ta bayendo mirando cu sa sosode cu e cliente ta haya un oportunidad pa entrevista inmediatamente serca un dunador di trabao despues di DPL pero no ta apto bisti of prepara (documenta) pa por acudi!

Semper mester ta prepara cu tur bo documentonan valido manera identificacion (Cedula) of un documento di Censo fl5,-. Documentonan di estudio, experencia laboral y/of cursonan semper por wordo pidi pa dunadornan di trabou. Ta recomenda tur cliente di DPL pa semper acudi representabel bisti pa asina engrandece e oportunidad pa haya un entrevista laboral di biaha. DPL kier a recorda tur cliente cu e servicio di busca un trabao via Jobcenter ta gratis y ta wordo brinda solamente parti mainta di 7:30 am pa 11:00 am.

Tene bon cuenta cu DPL su meta principal ta pa fungi como un “puente” entre abo y e dunadornan di trabao, pues DPL ta intermedia pero no ta tuma decision ken of cua candidato ta haya e trabao. Esaki ta pone cu e responsabilidad di logra convence e dunadornan di trabao cu abo ta e mihor candidato pa e funcion ta keda na cada cliente, esaki ta encera presenta cu tur documento pidi, un vestuario adecuado/profesional, un actitud positivo, abilidad pa bende bo mes como e mihor candidato y semper lagando un bon impresion atras.
Ban Traha! Ban Progresa!

DPL news