E departamento di “Advies Toelating Arbeidsmarkt” ta miho conoci como “Toelating” den nos comunidad. Ta trata aki di un departamento cu ta atende unicamente cu dunadornan di trabao of nan representante autorisa pa asuntonan di stranheria riba nos mercado laboral. Na momento cu un dunado di trabao tin of ta desea di tin un persona stranhero den servicio legal, e mester pasa den un proceso conforme e maneho stipula di DPL y mester pasa entre otro na e departamento aki pa asina haya un conseho (verklaring toetreding arbeidsmarkt). Esaki ta wordo traha a base di un sondeo profundo di nos mercado laboral (arbeidsmarkttoetsing) caminda “Advies Toelating Arbeidsmarkt” lo analisa un biaha mas si di berdad tin of no tin un hende local apto y disponibel pa yena e vacatura aki, prome cu duna un conseho positivo pa un stranhero bin na remarke. E conseho aki ta wordo entrega na e dunado di trabao pa e por continua cu su procedura na DIMAS. Si acaso DPL duna un conseho negativo sea cu ta pa motibo cu tin hende local apto, disponibel; of cu e dunado di trabao a nenga solicitantenan local sin motibonan valido y por escrito, e dunado di trabao por entrega un obhecion (bezwaar). Esaki no ta nifica cu e conseho lo wordo cambia, e peticion lo bolbe wordo evalua y trata pa un otro funcionario. Si e conseho keda negativo, e dunado di trabou mester cana e procedura completamente di nobo.
Den e maneho stipula tin un lista di argumentonan na ki momento un conseho por resulta negativo of positivo pa un stranhero por drenta nos mercado laboral.
E departamento aki ta traha unicamente a base di un cita online. Advies Toelating Arbeidsmarkt tambe ta forma parti di DPL su proteccion na nos mercado laboral pa medio di su maneho estricto riba e tereno di stranheria.
