Departamento di Progreso Laboral (DPL)

Departamento di Progreso Laboral (DPL) ta un departamento gubernamental cu a habri su portanan na aña 2011 pa asina brinda nos comunidad e servicio di intermediacion laboral dirigi specificamente riba nos localnan (esnan cu no tin mester di un permiso pa traha na Aruba). DPL tin como meta pa informa, stimula participacion laboral y yuda nos buscador y dunadornan di trabao local pa yega mas serca di otro riba nos mercado laboral. Esaki ta wordo ofreci abase di e servicio cu DPL ta brinda gratis na buscador y dunadornan di trabao local.

Pa locual ta trata buscadornan di trabao DPL ta registra esakinan den su databank y despues ta bay sondea e posibilidadnan laboral (entrevista laboral) dirigi ariba e capasidad y experencianan laboral di e cliente. Pa locual ta trata dunadornan di trabao DPL ta registra nan vacaturanan pa asina haya empleadonan local pa yena nan necesidadnan. DPL tin e departamento di Arbeidsbemiddeling en Reintegratie, mihor conoci como Jobcenter pa buscador y dunadornan di trabao, tambe tin e departamento di Advies Toelating Arbeidsmarkt cual ta e departamento concerni na momento cu un dunador di trabao ta desea di emplea un of mas stranhero (mester pasa un Arbeidsmarkt Toetsing prome conforme Maneho). DPL tin tambe e departamento di Bedrijfscontrole cual ta haci e controlnan necesario na momento cu un dunador di trabao entrega cualkier peticion sea di vacatura of sea di peticion pa stranhero (Aanvraag Advies Toelating) na DPL.

DPL ta resorta bou di e Ministerio di Labor, Energia y Integracion ta ehecuta e maneho cu ta wordo stipula pa Minister di Labor. E maneho aki ta publico y tur cambio y/of adaptacionnan haci ta wordo publica den medionan local pa asina tur dunador di trabao ta na altura di esakinan. Ta trata aki di maneho dirigi riba e proteccion di nos Mercado laboral pero tambe caminda cu e localnan tin preferencia riba e vacaturanan existente. Meta di e maneho aki ta pa sondea nos Mercado laboral local prome cu por entrega cualkier peticion pa un of mas stranhero por cuminsa of sigui traha na Aruba.

Servicionan di vacatura na DPL

DPL ta brinda e servicio di vacaturemelding na e afdeling Arbeidsbemiddeling en Reintegratie (Jobcenter), caminda cu ta ofrece 2 opcion di vacatura, sea un Open vacature of un vacaturemelding. Relaciona cu esaki nos ta amplia mas;

 

N

Openvacature ta wordo utiliza na momento cu e dunador di trabao tin mester di mas personal local (urgente) di cual DPL lo por tin den su database di esnan cu ta buscando trabao y/of DPL por publica esaki riba su lista di vacatura den corant y riba Facebook pa asina haya solicitantenan cu lo mester pasa un screening na DPL prome cu wordo manda pa bay solicita cu un cita na e dunador di trabao;

N

Vacaturemelding ta mara na un Maneho stipula pa Ministerio di Asuntonan Social y Labor caminda cu dunadornan di trabao cu ta desea di tuma un persona cu mester di permiso pa traha na Aruba (vergunningsplichtig) mester pasa den e procedura stipula conforme e maneho;

N

E maneho aki ta encera cu prome cu e dunador di trabao bay over na haci un peticion pa un vergunningsplichtig e mester pone su vacatura 3 siman disponibel na Jobcenter pa asina averigua si den e database y/of durante e 3 siman no tin niun persona local apto y dispuesto pa yena e vacatura aki;

N

Si resulta cu tin personanan local den e database y/of cu presenta durante e 3 siman y cu ta apto y dispuesto pa ehecuta e trabao, nan lo wordo manda pa medio di un cita na e dunador di trabao cu un carta di DPL;

N

Tur servicio di entrega, yuda yena formulario y controla formulario yena ta totalmente gratis y DPL ta recomenda dunadornan di trabao pa haci esaki nan mes of pasa libremente na un cita pa asina DPL mes yuda haci esakinan;

N

DPL ta traha cu cita pa entrega vacatura cual ta pone cu e servicio ta bay mas liher y eficiente pa e dunador di trabao;

N

DPL ta dispone di diferente buscadornan di trabao den tur ramo y nivel laboral;

N

E servicio di Openvacature no ta mara na niun compromiso of maneho y DPL ta screen tur solicitante prome cu manda esakinan cu un cita pa solicita na e dunador di trabao;

Cu esaki nos a kier a haci nos invitacion na dunadornan di trabao pa asina haci bon uzo di e oportunidad aki caminda cu por evita di inverti sumanan grandi pa publicacionnan den corant mirando cu e servicio aki ta totalmente gratis.

Si acaso bo compania ta desea di haya mas informacion riba e servicio aki nos ta mas cu dispuesto pa brinda esaki, por tuma contacto libremente cu DPL. Tambe nos ta dispuesto pa bishita bo compania y asina haya sa mas di bo necesidadnan na personal cualifica riba tur nivel di educacion/funcion.