DPL ta ofrece su servicio di registracion “online” pa esnan cu ta busca trabao!

Departamento di Progreso Laboral (DPL) su meta principal ta pa informa, guia y yuda nos localnan subi nos Mercado laboral. Pa e motibo aki DPL ta dispone di un maneho caminda cu nos localnan tin tur preferencia pa por haya un trabao. Den esaki DPL ta fungi como un puente entre e buscador y dunadornan di trabao y ta ofrece nan su servicionan di intermediacion laboral. Esaki ta nifica cu DPL ta mantene contacto cu ambos grupo pa asina monitoria y facilita e procedura nan di solicitud. DPL su servicionan di intermediacion laboral ta unicamente pa esnan cu no tin mester di un permiso pa por traha na Aruba. E servicionan aki semper a sosode pa medio di bishitanan personal, pues e buscador di trabao mester a presenta na DPL pa por registra su mes den e “databank” y e dunador nan di trabao mester a entrega nan vacaturanan personalmente pa asina DPL por a haci intermediacion y e asina yama “matching” den nos grupo di localnan disponibel.

COVID – 19
Durante di e periodo di COVID – 19, DPL a sa di haci e adaptacionnan necesario pa por continua cu su servicionan di registracion di buscadornan di trabao. DPL ta ofrece e servicio di registracion pa buscamento di trabao pero unicamente online riba e website: www.dpl.aw ta click riba registracion y yena tur informacion y finalmente por upload un CV cual sigur lo yuda DPL pa “match” bo persona mas mihor posibel. Manera ta conoci durante di e periodo aki di crisis hopi dunador nan di trabao a haya nan mes obliga di manda empleado nan cas y/of cera nan portanan.
Esaki ta pone cu nos tin un grupo mas grandi di personanan cu eventualmente lo cuminsa busca un otro trabao.

Normal nobo
Gobierno di Aruba a inicia caba cu e proceso di e asina yama normal nobo caminda cu poco poco a cuminsa habri sectornan laboral, ta habriendo fronteranan etc. Pa e motibo aki tambe DPL a cuminsa di awor caba cu e registracion di esnan cu no tin un trabao of esnan cu a perde nan trabao durante COVID – 19. Ta pidi e gruponan aki pa haci uzo di e registracion online pa asina yuda DPL tin un mihor bista di e situacion real y tambe pa DPL por cuminsa cu e proceso di aloca e gruponan aki bek na trabao na momento cu mas vacaturanan wordo habri. Na e momento nan aki ainda DPL ta den e fase di ricibi vacaturanan di dunadornan di trabao cu a cuminsa habri bek. Buscadornan di trabao cu haci uzo di e registracion online lo wordo yama despues asina cu DPL tin vacaturanan disponibel y cuminsa atende cu publico. Ta pidi tur dunador di trabao cu tin mester di mas personal pa tuma contacto cu DPL y comparti nan vacaturanan pa asina hunto nos logra crea e progreso cu nos hendenan merece!